Sögukvöld, páskeggjaleit og lifandi tónlist á Suðureyri um páskana

Það verður nóg um að vera á Talisman og FSÚ-barnum um páskana að sögn Jóns Arnars Gestssonar rekstraraðila. "Hér verður opið frá kl 08 að morgni alla daga til miðnættis. Við verðum með hlaðborð í hádeginu og á kvöldin alla páskana hér á Talisman og ýmsar uppákomur bæði fyrir fullorðna og börn," segir Jón. 

Á Skírdagskvöldið verður Sögustund á Talisman þar sem sagnamenn og konur mæta og segja sögur úr ýmsum áttum. Allir sem luma á góðum sögum eru hvattir til að mæta á staðinn og vera með. 

Eftir miðnætti á Föstudaginn langa verður boðið uppá lifandi tónlist og trúbadorsstemningu á FSÚ-barnum. Tilvalið fyrir heimamenn og gesti að safnast þar saman og gleðjast í góðra vina hópi.

Á Páskadag verður Páskaeggjaleit á Suðureyri sem er verið að útfæra. Nánar um það síðar. Eftir miðnætti á Páskadag verður karaoikí-kvöld á FSÚ-barnum þar sem hver og einn verður söngstjarna kvöldsins með sínu sniði.

Eins og sjá má hér að ofan, verður nóg fyrir stafni á Suðureyri yfir Páskahelgina. Minni líka á handverkshúsið Á milli fjalla þar sem hægt er að gera góð kaup á alls kyns handgerðum varningi úr heimabyggð. Handverkshúsið er staðsett í gamla Kaupfélaginu á móti Talisman.

Einnig má geta þess að tökur á kvikmyndinni Vaxandi tungl mun standa yfir á Suðureyri um og eftir páskana. Þá má líklega sjá bregða fyrir þekktum andlitum á eyrinni, eins og t.d. Pálma Gests, Elvu Ósk og Elfari Loga.

Páskamót í blaki verður í íþróttahúsinu Föstudaginn langa. Sjá nánar í frétt hér fyrir neðan.

Kveðja

Róbert Schmidt

Páskamót í blaki á Suðureyri

Haldið verður í annað sinn Páskamót í blaki í íþróttahúsinu á Suðureyri laugardaginn 3. apríl. Blakmótið verður eins konar skemmtiblak þar sem ungir og aldnir leiða saman hesta sína til að hafa gaman af. Mótið hefst kl 11:00 um morguninn og er þátttökugjald kr 300 á einstakling. Mótið er fyrir 14 ára og eldri. Skráning þarf að klárast kl. 15:00 á Föstudaginn langaSkírdag til Önnu Bjarna í síma: 897-5153.

Þátttakan sker úr um hvort mótið verður liðakeppni eða einstaklingskeppni. Páskablakið er tilvalin skemmtun fyrir þá sem vilja sprikkla aðeins og eiga góðan dag með skemmtilegu fólki, komast í sund á eftir og slaka á í heitu pottunum og spjalla saman. Vegleg verðlaun verða í boði eins og síðast. Hvetjum alla áhugasama 14 ára og eldri að skrá sig til leiks sem fyrst.

Munið skráningasímann: 897-5153

Kveðja

Róbert Schmidt
S: 8404022 

 

 

Landgangslaus flotbryggja

Eins og sjá má á meðfylgjandi ljósmynd er ógengt út á flotbryggjuna í smábátahöfninni á Suðureyri en landgangurinn fór enn eina ferðina í sjóinn í síðasta óveðri. Landgangurinn laskaðist talsvert og er væntanlega í viðgerð á Ísafirði um þessar mundir. Margir hafa nefnt að of stórir bátar séu bundnir við flotbryggjuna og í óveðrum fer bryggjan á mikla hreyfingu sem veldur því að landgangurinn fellur í sjóinn. Heimamenn kippa sér lítið upp við þessa sjón enda gerist þetta iðulega þegar hvessir vel í firðinum.

Kveðja

Róbert Schmidt
Ljósm: R.Schmidt

Hákarlaskurður í snjóskafli

Fyrr í vikunni var hér greint frá vænum hákarli sem Sigurður Oddsson á Lukku ÍS 357 frá Suðureyri fékk á línu í Nesdýpinu. Hákarlinn vó rétt um 700 kg að þyngd og mældist 470 sm að lengd. Ævar Einarsson, útgerðarstjóri Íslandssögu og Valgeir Hallbjörnsson tóku fegins hendi við kvikindinu enda sjaldgæft núorðið að "ódrættir" komi að landi í Súgandafirði. Fiskisagan var ekki lengi að fréttast um þorpið. Börn og fullorðnir mættu á svæðið þar sem þeir Ævar og Valli slægðu hákarlinn ofaní fiskikar og lifrin flæddi um allt ásamt þorski og steinbít sem hákarlinn hafði étið af línunni hans Sigga Odds. Síðan var hausinn skorin af og skrokkurinn lagður í næsta snjóskafl.  

Ævar stálaði hnífinn sinn, skellti sér á skeljarnar og hóf hákarlaskurðinn af miklum móð þar sem hann lá í skaflinum. Þunnildin voru fyrst skorin af, síðan uggarnir og sporðurinn. Þar næst var hann skorinn endilangt í tvo hluta og síðan í væna bita sem Valli setti í kar. Örlygur Ásbjörnsson eða Ölli, fylgdist með en hann og Leifi Noggi heitinn, skáru marga hákarla saman hér á árum áður og það mátti sjá glampann í augunum hans Ölla þar sem hann studdi sig við stafinn sinn og upplifði á ný þessa ævifornu verkunaraðferð Íslendinga. Ævar hafði greinilega fylgst með Leifa frænda sínum við hákarlaskurðinn og skar kvikindið fumlaust með beittum hnífnum.

Hákarlsbitarnir voru síðan vigtaðir, skolaðir og settir í fiskikar. Þeir vógu um 310 kg samtals. Síðan var sett þungt hlass ofaná bitana til að ná sem mestum vökva úr kjötinu og einnig til kæsingar. Verkunartíminn er framleiðsluleyndarmál eins og gefur að skilja en búast má við að kæsingin taki fáeina mánuði og síðan eru beiturnar hengdar á hjall í 5-6 mánuði til þurrkunnar. Það ætti því að vera nægur hákarl í boði fyrir næsta þorrablót frá þeim Ævari og Valla. Við skulum til gamans kíkja á smá fróðleikskorn um hákarla og verkun þeirra.

Hákarlategundir í íslenskri lögsögu eru 13 talsins en fjölmargar aðrar tegundir hafa þvælst hér um og ratað í veiðarfæri sjómanna eða rekið á land. Algengasta tegundin hér við land getur verið meira en 7 metrar að lengd og á annað tonn að þyngd, þó að þeir verði oftast 2-5 metrar. Þetta er eina háfiskategundin sem lifir í ísköldum sjó. Áður fyrr voru hákarlar mikið veiddir en veiðar hafa dregist verulega saman. Talið er að hákarlar hafa verið til í sinni mynd í 300 ár.

Skömmu eftir að hákarl er drepinn tekur þvagefnið að brotna niður og eitt af myndefnum þess er ammoníak. Það flæðir um allt hold dýrsins og styrkur þess getur verið svo mikill að sá sem neytir þess getur fengið eitrun og jafnvel dáið. Dæmi eru um að ísbirnir hafi étið hræ af grænlandshákarli og orðið skammlífir eftir árið. Erlendis eru hákarlar blóðgaðir strax eftir að þeir eru drepnir og síðan kældir. Við blóðgunina næst þvagefnaríkt blóðið úr dýrinu og þá er hægt að neyta kjötsins án þess að finna keim af ammoníaki.

Á Íslandi hefur svonefnd kæsing verið notuð frá alda öðli til að losna við eitrunaráhrif ammoníaks. Hún felst í því að hákarlinn er látinn gerjast í 1-3 mánuði í moldar- eða malargryfju og síðan þurrkaður. Gerjunin brýtur niður köfnunarefnissambönd í vöðvum dýrsins. Hákarlakjöt er borðað víða um heim og veiðimenn sækjast aðallega eftir minni tegundum (undir 25 kg) en hold þeirra þykir ljúffengara en hold stóru hákarlanna, þó undantekningar séu frá þeirri reglu.



Ljósmyndir: Róbert Schmidt
Heimildir: Vísindavefurinn, Doktor.is og Skutull.is

Kveðja

Róbert Schmidt

 

Fékk 700 kg hákarl á línu

Enn og aftur kemur Sigurður Oddsson á Lukku ÍS 357, frá Suðureyri, að landi með "happadrátt" en í dag landaði Siggi tæplega 700 kg hákarli sem hafði flækt sig í línunni vestur í Nesdýpi á 52 faðma dýpi. "Ég var búinn að fá helvíti gott á þennan bala eða um 300 kg og svo í restina sé ég að þarna er hákarl á línunni. Þannig að það má segja að ég hafi fengið 1000 kg á balann," sagði Siggi ánægður með daginn. Óhætt er að segja að meiri afli hefur varla fengist á einn línubala hér vestra fyrr né síðar.

Hákarlinn mældist 470 sm að lengd og ummálið var hvorki meira né minna en 230 sm. Þetta er stærsti hákarl sem Siggi hefur veitt en í janúar kom hann að landi með 340 kg hákarl. Hákarlinn verður skorinn og verkaður á næstu dögum og verður tilbúinn fyrir næsta þorrablót að ári.

Mikil stemning var á höfninni þegar hákarlinum var landað en honum var slefað í land enda vonlaust að koma 700 kg flykki um borð í eins lítinn bát og Lukka er. Siggi veiddi tvær stórlúður á haukalóð í fyrra, 88 kg og 34 kg. Í ár er hann búinn að fá eina 24 kg lúðu og 700 kg hákarl.

Meðfylgjandi myndir tók undirritaður þegar hákarlinum var landað á Suðureyrarhöfn í dag. 

Kveðja

Róbert Schmidt

Sumarhús Hvíldarkletts til leigu um páskana

Sjóstangaveiðifyrirtækið Hvíldarklettur hefur ákveðið að bjóða sumarhúsin sín til leigu yfir páskana. Um er að ræða 9 kanadísk sumarhús á Flateyri og 3 sams konar hús á Suðureyri. Einnig er möguleiki á að fá leigð nokkur hús til viðbótar á Suðureyri.

Útleigan á húsunum miðast við 3 nætur.
1-2 manns í 3 nætur kr. 30.000
10.000 kr bætast síðan við hvern mann í gistingu. Sumarhúsin eru öll með 3 herbergi (fyrir 5 manns samt), baðherbergi, stofu og eldhúsi. Húsin eru fullbúin húsgögnum. Ath sjónvarp fylgir ekki.

Nánari uppl gefur Jón Svanberg í síma 894-8836 [e-mail] og Róbert Schmidt í síma 8404022 [e-mail]

Á eftirfarandi tengli er hægt að sjá fleiri myndir af húsunum sem og innimyndir.
http://sudureyri.blog.is/album/sumarhus_hvildarkletts/

Kveðja

Róbert

Pálmi Gests og Elva Ósk á leið til Suðureyrar

Tökur á myndinni Vaxandi tungl hefjast seinni hluta marsmánaðar á Suðureyri og fer Pálmi Gestsson leikari og Bolvíkingur með aðalhlutverkið. Einnig mætir leikkonan Elva Ósk á eyrina ásamt fríðu föruneyti. Myndin er eftir Lýð Árnason lækni. Framleiðendur eru; Í einni sæng, Íslandssaga á Suðureyri og Sigurður Ólafsson. Búast má við að tökur standi yfir í nokkrar vikur.

"Vaxandi tungl fjallar um aldraða konu sem deyr í litlu sjávarþorpi. Eldri sonur hennar býr á staðnum ásamt fjölskyldu, en yngri sonurinn býr í Reykjavík með konu sinni. Lát gömlu konunnar vekur átök á milli bræðranna. Óvænt þungun flækir málin enn frekar. Kemur þá til skjalanna yngsta dóttirin, augasteinn ömmu sinnar. Hún finnur fyrir nánd gömlu konunnar, afræður að bjóða örlögunum birginn og berjast fyrir sínu," segir á heimasíðu Í einni sæng. Nánari upplýsingar eru að finna á eftirfarandi tengli:

http://ontrack.is/vaxanditunglfrettir.htm

Í samtali við Pálma segir hann að þetta sé fyrsta kvikmyndin sem hann leikur í fyrir vestan og það sé tilhlökkunarefni að dvelja þar á meðan á tökunum stendur. "Ég kem til með að keyra á milli og verð í húsinu mínu, Hjara, í Víkinni. Þetta leggst mjög vel í mig og ég hlakka til," segir Pálmi sem leikur aðalhlutverkið í myndinni, bróðurinn Friðbert.

Kveðja

Róbert Schmidt

Leitað að Sæluhelgarlagi 2010

Mansavinir á Suðureyri leita nú eftir Sæluhelgarlaginu 2010 en að vanda gefst fólki kostur á að senda inn lög í keppni um lagið sem verður hljóðritað fyrir hina árlegu Sæluhelgarhátíð. Skilyrði eru sem fyrr að lagið má ekki hafa heyrst áður og textinn verður að einhverju leyti að fjalla um Sæluhelgina, Súgandafjörð eða Suðureyri. Lagahöfundar eru beðnir um að senda inn hljóðritaðan disk, í því sem næst endanlegri útgáfu, í lokuðu umslagi merkt með dulnefni en rétt nafn þarf að fylgja með í öðru umslagi ásamt símanúmeri.

Frestur til að skila inn lagi er 19. apríl. Við vonum að Íslendingar taki vel við sér og láti sköpunargleðina ráða ríkjum næstu vikunnar. Tilkynnt verður um sigurlagið á sumardaginn fyrsta.

Væntanlegir keppendur eru beðnir um að senda lögin til Ævars Einarssonar.

Mansavinir
Hlíðarvegi 4
430 Suðureyri