Frábær skötuveisla

Skötuveislan hjá Eyþóri Eðvarðs á Álftanesinu heppnaðist frábærlega en alls mættu 20 sprækir súgfirskir karlmenn sem tóku hressilega til matar. MERLO, fyrirtæki Magnúsar Erlingssonar gaf skötuna í veisluna en skatan kom frá Jóa Bjarna á Suðureyri. Einnig var boðið uppá saltfisk fyrir þá sem ekki eru enn búnir að læra skötuát. Farið var með vísur í tilefni dagsins og menn kepptust við að skjóta á hvern annan í bundnu máli en Sturla Eðvarðs sló í gegn með sínum snilldar kveðskap. Sögur að vestan voru líka rifjaðar upp og mikið hlegið og skálað.

Myndasýningu var síðan skellt á stofuvegginn þar sem farið var yfir síðustu karlaveislur hér á höfuðborgarsvæðinu. Boðið var uppá beykireykt hreindýrakjöt, heitreyktan svartfugl og reyktar heiðagæsabringur með melónu og róspiparsósu og var það allt étið upp til agna eins og búist var við. Benni Bjarna kíkti í heimsókn og Kitti Kalli kom og smalaði nokkrum ballþyrstum köllum í leigubílinn sinn og skutlað þeim á Players.

Ég setti inn 57 myndir í sérstakt myndaalbúm á síðunni.
Njótið vel.

Kveðja

Róbert

Athugasemdir

[Anna Bjarnad (IP-tala skráð) 15.12.2008 kl. 00:55]

Úff maður fær bara vatn í munninn að sjá þessa skötu, nú þegar farin að hlakka til Þorláksmessu og fá skötuna, allavega búin að gera mörinn. Þetta hefur verið hin besta veisla sér maður. Flott hjá ykkur strákar í Stefni.