Áfengi í póstkröfum

Eyrarpósturinn
16. febrúar 1984

Tilkynning: “Discotekið sem halda átti sl laugardag, en var frestað, verður haldið laugardaginn 18. febrúar. Gárungarnir segja að frestunin hafi stafað af því að “veigarnar” bárust ekki í tæka tíða.”

Svona var þetta í gamla daga  Þá þurfti að panta áfengi í póstkröfu sem kom ýmist með flugi eða bílum og ef ófært var, þá fékk engin vínið sitt. Þessu muna eflaust margir eftir. Ef ég man rétt, þá var meira að segja haldið heilt þorrablót og allar vínpóstkröfurnar læstar inni á pósthúsinu yfir alla helgina því vínið kom ekki á opnunartíma.

Kveðja

Robbi Schmidt

Sunna Sturludóttir valin í æfingahóp landsliðs kvenna

Ísfirðingurinn (Súgfirðingurinn)  Sunna Sturludóttir (dóttir Sturla Páls og Ragnheiðar)  hefur verið valin í 25 stúlkna æfingahóp fyrir 15 ára landslið kvenna í körfuknattleik. Sunna er leikmaður 9. flokks kvenna hjá KFÍ. Hún er ein af lykilleikmönnum í sínum flokki og hefur bætt sig mikið í vetur. Við óskum henni til hamingju með þessa jákvæðu viðurkenningu að vera valin í æfingahóp landsliðs kvenna í körfuknattleik.

Heimildir www.bb.is
Ljósmynd www.bb.is

Gamlir fréttamolar úr Eyrarpóstinum

Sjálfsagt muna margir Súgfirðingar eftir Eyrarpóstinum sem Einar Logi Einarsson gaf út á Suðureyri í kringum 1983 og 1985. Sveinbjörn Dýrmundsson tók síðan við útgáfunni. Það virkilega skemmtilegt að lesa þessi blöð og þar kennir margra grasa. Það er því tilvalið að birta gamla fréttamola og efni úr Eyrarpóstinum hér á síðunni vonandi öllum til gamans.

Eyrarpósturinn
14. nóv 1984

"Hitaveitan bilaði í gær. Búist er við að bilunin finnist ekki fyrr en undir kvöldið og að viðgerð geti tekið 2-3 sólahringa. Á meðan liggur öll starfsemi Grunnskólans og Tónskólans niðri, en hefst strax aftur, þegar hitaveitan kemst í lag."


"Kjartan Rafn og Oddur hringdu og kvörtuðu yfir miklum hálkublettum víða og tiltóku sérstaklega gangstéttina við Túngötuna á leið til skólans og hjá stiganum fyrir ofan Kaupfélagið. Þarna þyrfti að bera sand á,- sögðu þeir félagar."

Eyrarpósturin
7. nóv 1984

"Maður hafði samband við blaðið og var óhress yfir þeirri "skemmdarstarfsemi", eins og hann orðaði það, sem börn og unglingar hefðu gagnvart ísnum á tjörninni. Hann næði nálega aldrei að frjósa, því hann væri brotinn áður og þarna færi prýðis skautasvell forgörðum."


Eyrarpósturinn
31. okt 1984

Gripið niður í samþykkt um hundahald í Suðureyrarhreppi:
"Hundahald er bannað í Suðureyrarhreppi. Frávik heimil til lögregluyfirvalda, blindra, fólks með sálræn vandamál og fyrir minkahunda. Leyfishöfum ber að skrá hunda sína, greiða skráningargjald, ábyrgðartryggja þá og hlíta ennfremur reglum um hreinsun hunda. Hundur skal aldrei ganga laus á almannafæri, heldur vera í taumi í fylgd með aðila, sem hefur fullt vald yfir honum. Eigi er leyfilegt að fara með hunda inn í samkomuhús, skólahús, matvöruverslanir eða aðra staði, þar sem matvæli eru um hönd höfð. Heimilt er að aflífa óleyfilega hunda 10 dögum eftir að þeir hafa verið færðir í sérstaka hundageymslu á vegum Suðureyrarhrepps, hirði eigendur ekki um að ráðstafa þeim og greiða áfallinn kostnað."

Þar höfum við það
 

26 ára gamall Stefnisleikur sýndur á Suðureyri 10. apríl

Nokkrir félagar úr Íþróttafélaginu Stefni á Suðureyri munu standa fyrir sýningu á 26 ára gömlum knattspyrnuleik sem háður var á Skeiðinu á Ísafirði 18. júní 1983 en þá mættust Stefnir og Afturelding frá Mosfellsbæ í Íslandsmóti í knattspyrnu í 4 deild. Leikurinn hefur verið færður yfir á DVD og er í fullri lengd. Leikurinn verður sýndur í kaffisal Íslandssögu á Suðureyri kl 20.00 á Föstudaginn langa.

Björn Guðbjörnsson segir stuttlega frá þessari leiktíð ásamt tölfræði og öðrum áhugarverðum upplýsingum. Valinn verður “maður leiksins” sem fær að launum fallegan verðlaunagrip. Heiðursgestir kvöldsins verða þeir Arnar Guðmundsson, Þorsteinn Guðbjörnsson og Jens Daníel Holm en þeir tóku þátt í umræddum leik ásamt Birni Guðbjörnssyni. Þessir fjórir fulltrúar liðsins verða vonandi allir á staðnum.

Einnig er stefnt að sýna gamlar myndir frá knattspyrnuleikjum Stefnis á Suðureyri. Þeir sem kunna að eiga í fórum sínum gamlar myndir (í lit eða svarthvítar) eru beðnir um að senda þær á tölvutæku formi á [e-mail]ða hafa samband við Róbert Schmidt í s: 8404022.

Allir innilega velkomnir á meðan húsrúm leyfir. Stefnismenn vilja þakka Íslandssögu kærlega fyrir afnot af húsnæðinu undir þennan skemmtilega viðburð.

Meðfylgjandi ljósmynd var tekin á Melavellinum í Reykjavík 25. júní 1983 eða viku eftir leikinn við Aftureldingu.

Áfram Stefnir

Stefnir United

Páskamót í blaki á Suðureyri 10. apríl

Ákveðið hefur verið að halda lauflétt Páskamót í blaki í íþróttahúsinu á Suðureyri Föstudaginn langa kl 10.30 og mun standa fram eftir degi. Keppt verður í blönduðum liðum til að gera leikina sem skemmtilegasta og í anda jafnréttisreglunnar. Áætlað er að hver leikur verði 2 lotur spilaðar upp í 21 stig. Skráning fer fram hjá Þorgerði Karlsdóttur í s: 899-9562 eða með tölvupósti [e-mail]

Þátttökugjald pr haus er kr. 500. Innifalið er aðgangur að sundlaug Suðureyrar í mótslok. Óvænt verðlaun afhent í lok mótsins.

Allir áhugamenn um blak á Suðureyri og nærliggjandi stöðum eru  velkomnir á þetta skemmtilega Páskamót í blaki. Hristum af okkur slenið og drífum okkur á völlinn.
Skráðu þig núna

Súgfirskar blakáhugakonur- og menn

Meðfylgjandi mynd tók Halldór Sveinbjörnsson / Ágúst G Atlason.
Heimildir: www.hsv.is/skellur

Stefnismenn rifja upp 26 ára gamlan leik

Nokkrir hressir Stefnismenn hittust í kvöld (26. mars) til að rifja upp 26 ára gamlan knattspyrnuleik sem háður var á Ljónsvellinum (Skeiðinu)  á Ísafirði 18. júní 1983 en þá léku Stefnir frá Suðureyri við Aftureldingu frá Mosfellsbæ í 4 deildinni. Þjálfari Stefnis var þá Magnús Erlingsson sem lék jafnframt með liðinu. Það var Björn Guðbjörns sem hóaði okkur strákunum saman á heimilið sitt í Fellsmúlanum enda hafði Björn komist yfir myndband af öllum leiknum og fært yfir á DVD. Tilhlökkunin var mikil að horfa á þennan leik sem er mikil heimild og líklegasti sá eini sem til er af Stefnisliði fyrr og síðar.

Þeir sem mættu í Fellsmúlann ásamt gestgjafanum voru þeir Magnús Guðfinnsson, Magnús Erlingsson, Magnús Friðjónsson, Örn Sævar Holm og Róbert Schmidt. Nokkuð var um forföll en það gerðist líka oft í leikjunum hér um árið þegar menn höfðu vöxtinn og hárið. Boðið var uppá pizzur og gos ásamt hlaðborði af snakki og sælgæti að hætti Björns sem hafði að auki prentað út 10 leikskýrslur frá þessu sumri. Á þessum tíma voru þeir Björn og Maggi Erlings 23 ára gamlir, tágrannir og spengilegir. Stefnisliðið í þessum leik skipuðu eftirfarandi knattspyrnumenn samkvæmt leikskýrslu:

Jens Daniel Holm
Örn Sævar Holm
Magnús Erlingsson
Þorsteinn Erlingsson
Björn Guðbjörnsson
Arnar Guðmundsson
Guðmundur Vignir Friðjónsson
Gunnlaugur Guðleifsson
Þorsteinn Guðbjörnsson
Rögnvaldur Guðmundsson (Flateyri)
Halldór Antonsson (Ísafirði)

Varamenn voru þeir Hjálmar Erlingsson og Hlynur Jensson.
Dómari var Garðar Smári Gunnarsson frá Ísafirði.

Leikurinn var hin besta skemmtun að horfa á og margir snilldar taktar voru sýndir á grýttum malarvellinum þrátt fyrir fáeina drullupolla sem voru hér og þar um völlinn. Öddi skoraði fyrsta markið eftir aðeins 5 mín leik og náði síðan að skora annað mark í fyrri hálfleik en Mosfellingar náðu að setja boltann einu sinni í netið hjá Jenna Holm áður en flautað var til hálfleiks. Seinni hálfleikurinn var reyndar töluvert lengri en hefðbundinn leiktími en líklega hafði dómarinn gleymt sér í öllum látunum og sjaldan séð aðra eins spilamennsku að það varð að minna hann á að leiktíminn var útrunninn. Gummi Vignir skoraði þriðja mark Stefnismanna og eftir það var mikið pressað á Súgfirðingana og varði Jenni Holm hvern boltann af öðrum. Þreytan var farin að segja til sín hjá leikmönnum beggja liða en Afturelding náði með harðfylgi og liðsinni dómara að jafna leikinn fáeinum sekúndum áður en dómarinn flautaði til leiksloka.

Það var mikið hlegið í stofunni hjá Birni þetta kvöld og svo voru mörg atriði úr leiknum sýnd aftur. Kom til tals að senda KSÍ fáeinar athugasemdir við dómgæsluna í þessum leik en líklega er það aðeins og seint í rassinn gripið 26 árum eftir að leiknum lauk. Örn Holm fékk að líta gula spjaldið sem og Steini Imbu fyrir grófan leik og Þorsteinn Erlings fékk áminningu fyrir minniháttar brot eða “handbolta”.

Að lið frá 450 manna sjávarþorpi vestur á fjörðum skuli hafa náð jafntefli við knattspyrnulið frá 2500 manna bæ að sunnan þótti nú bara andskoti góður árangur en sjálfsögðu áttu Stefnismenn að vinna leikinn. Einhverjir sögðu að Halli Bjössi hafði sett álög á Stefnisliðið fyrir leiktíðina þegar hann komst ekki með á Ísafjörð til að horfa á leik með liðinu og sagði við þá og veifaði fingri til þeirra “Þið vinnið ekki einn einasta leik í sumar” Samkvæmt tölfræði sumarsins var fátt um sigra en ansi mörg jafntefli og voru álögin frá Hallbirni því talin vera helsta ástæða fyrir frekari sigurgöngu Stefnismanna þessa leiktíð.

Eftir áhorf leiksins var klappað fyrir leikmönnum og síðan var kosið um mann leiksins. Þjálfarinn fékk að kjósa tvisvar. Úrslit verða gerð kunn síðar til að halda spennunni aðeins áfram. Síðan voru sagðar sögur að vestan fram eftir kvöldi og menn kvöddu hvern annan með tárin í augunum eftir allan hláturinn. Læt fylgja hér fáeinar myndir frá þessu skemmtilega kvöldi. Hópmyndina tók Harpa, dóttir Björns.
Fleiri myndir er að finna í myndaalbúminu á síðunni.

Með Stefniskveðju

Róbert Schmidt




 

Rauðmagavertíðin hafin í Súgandafirði

Vorboðinn ljúfi, rauðmaginn er kominn í Súgandafjörð. Þeir Ævar Einarsson og Valgeir Hallbjörnsson fengu sex rauðmaga í netin sín við Stekkjarnesið fyrir fáeinum dögum sem segir að vorið er á næsta leiti þótt páskahretið sé enn eftir og Hvítasunnuhretið líka. Rauðmagaveiðin í Súgandafirði í fyrra var mjög góð en þá veiddust um eða yfir 5000 rauðmagar í net súgfirskra rauðmagaveiðimanna en þeir sem voru öflugastir í fyrra voru þeir Bjössi Kristmanns, Egill Kitt, Valli & co og síðan lagði Ölli fáein net með Steina og Ævar var líka með rauðmaganet í sjó. Meðfylgjandi mynd tók undirritaður af þeim Ævari og Valla í fyrra þegar þeir prófuðu Haukalóð út af Galtarvita.

Kveðja

Róbert

Hollvinasamtök FSÚ stofnuð

Hollvinasamtök Félagsheimili Súgfirðinga / FSÚ, héldu stofnfund á Suðureyri 20. mars sl en samtökin vilja hlúa að gamla félagsheimilinu og endurbyggja það með aðstoð einstaklinga og fyrirtækja. Stjórn FSÚ var kosin á fundinum en hana skipar eftirfarandi aðilar: Óðinn Gestsson formaður, Erla Eðvarðsdóttir ritari, Vernharð Jósefsson gjaldkeri og meðstjórnendur eru þau Halldóra Hannesdóttir og Leifur Blöndal. Varamenn eru Ævar Einarsson og Valur Valgeirsson. Skoðunarmenn reikninga eru Ágústa Gísladóttir og Sigurður Ólafsson.

Á stofnfundinum færði Guðni Einarsson samtökunum eina milljón króna fyrir hönd stjórnar Klofnings. Þá tilkynnti Óðinn Gestsson um gjöf uppá 1,5 milljónir króna frá Íslandssögu ehf og tengdum fyrirtækjum. Alls hafa 150 manns skráð sig sem stofnfélagar FSÚ á Facebook. Hvíldarklettur ehf hefur boðist til að sjá um lóðafrágang við húsið og Mansavinir færðu samtökunum peningagjöf upp á 250 þúsund krónur auk 40 þús kr framlags frá áramótadalsleik sem áhugamenn héldu.

Á stofnfundinum var einnig ákveðið að ganga til viðræðna við eigendur félagsheimilisins um að þeir velti fyrir sér hver framtíð  hússins geti verið. Samkvæmt uppl samtakana eru eigendur hússins Ísafjarðarbær sem á 55%, Verkalýðsfélag Vestfirðinga 15%, Íþróttafélag Stefnir 15%, Kvenfélagið Ársól 15%. Erindi samtakana var tekið fyrir á fundi bæjarráðs og bæjarstjóra falið að ganga til viðræðna við stjórnina.

Á fundinum var einnig samþykkt að allir geta orðið stofnfélagar sem skrá sig fyrir 17. júní nk á netfangið: [e-mail] þarf fram kennitölu og netfang viðkomandi. Félagsgjald í FSÚ er kr. 1000.

Heimildir www.bb.is

 

Hvíldarklettur auglýsir eignir sínar til sölu

„Já, ég get staðfest það en það er ekki búið að klára eitt né neitt,“ segir Elías Guðmundsson, framkvæmdastjóri ferðaþjónustufyrirtækisins Hvíldarkletts ehf. á Suðureyri, aðspurður hvort einhverjir aðilar hafi sýnt eignum fyrirtækisins áhuga, en allar eignir Hvíldarkletts voru settar á sölu í síðustu viku. Elías segist ekki sjá fram á annað en starfsemi fyrirtækisins verði áfram í sumar. Hann segir aðilana, sem eru í viðræðum við fyrirtækið um kaup á eignum þess, vera tengda ferðaþjónustubransanum en Elías vildi ekki tjá sig um hvort Hvíldarklettur kæmi til með að sameinast ferðaþjónustufyrirtækinu Sumarbyggð í Súðavík.

Heimildir www.bb.is

Grímudansleikur á Suðureyri

Miðvikudaginn 25. Feb. stóð Íþróttafélagið Stefnir og Foreldrafélag Grunnskólans fyrir árlegu maska-dansleik í Fsú. Að vanda mættu margar furðuverur á dansleikinn þar sem kötturinn var sleginn úr tunnunni og síðan stiginn dans á eftir.  Aðstandendur  voru sammála um að í ár hefði þátttakan verið óvenju góð og   búningar barnanna verið vandaðir og ljóst að margir höfðu lagt á sig mikla vinnu við gerð búninganna. Þegar dansleiknum lauk gengu börnin í hús á Suðureyri og sungu fyrir heimamenn. Að launum fengu þau eitthvað gott nammi frá húsráðendum. Það voru því mörg börn sem sofnuðu þreytt þetta kvöldið, með leifar af málningunni enn í andlitinu og létu sig dreyma um fullan nammipoka sem biði þeirra næstu dag.

Kveðja

Sturla Páll Sturluson
Suðureyri