Vígalegur hlýri

Hann er vígalegur þessi hlýri sem Steindór Ingi Kjellberg á línubátnum Kristjáni ÍS á Suðureyri heldur á. Hlýrinn er nokkuð stór eða um 18 kg en þeir geta orðið mun þyngri og stærri. "Það voru mikil læti í þessum þegar ég var að koma honum inn fyrir en hann náði að bíta í annan vettlinginn minn og reif gat á hann. Sem betur fór, náði hann ekki að bíta í höndina, það hefði ekki verið þægilegt," sagði Steini hress og kátur en þeir félagar á Kristjáni ÍS lönduðu um tveimur tonnum af blönduðum afla í dag. Spáð er bræluskít næstu tvo daga en laugardagurinn verður líklega góður til sjóferða.  Ágætt er að minna svartfuglaskyttur á að síðasti veiðidagur á svartfugli er á sunnudaginn, 10. maí.

Ljósm: R.Schmidt

Kveðja

Róbert
[e-mail]
 

Stuðeyri kosið Sæluhelgarlag Suðureyrar 2009

Ævar Einarsson, “mansapabbi” og Sturla Páll Sturluson efndu til kosninga um sæluhelgarlag fyrir komandi Sæluhelgi á Suðureyri en tvö lög voru send inn í keppnina sem er árlegur viðburður. Súgfirðingar fjölmenntu í kaffisal FSÚ kl 18.00 í dag og fengu að hlusta á lögin og lagatextunum var dreift á alla sem mættu. Því næst fengu gestirnir að kjósa um lögin Stuðeyri (A) og Fjör á Sæluhelgi (B). Kosningin var tvísýn en bæði lögin fengu 14 atkvæði og þurftu þeir Ævar og Sturla Páll að skera úr um eitt vafa atkvæði sem var lítið a á blaði og sigraði lagið Stuðeyri því keppnina með eins atkvæða mun.

Höfundur lags og texta er “Gromsarinn” eða Hálfdán Bjarki Hálfdánarson en hann söng einnig lagið. Hákon er söngvari í hljómsveitinni Kraftlyfting sem t.d. spilaði á síðasta Góufagnaði á Suðureyri.

STUÐEYRI

Klikkað kassabílarall
kófsveitt Sæluhelgarball
kemst í stuðið meðan ligg ég í baði
Á Sjöstjörnu ég sælu fæ
svölum Suðureyrarbæ
senn ég þurrka mér og klæði með hraði 

Tíminn líður, leigarinn bíður
það voru boruð göng, og leiðin er ekki svo löng
ég verð að fara, af því bara
á Suðureyri, ég verð að 

koma mér á Sæluhelgina
kreista í mig rauðvínsbelgina
stuðið það á lögheimili hér
verð að komast beint á sælujötuna
og þó ég æli á götuna
þá fyrirgefa Súgfirðingar mér

Húsmæðraboltinn heillar mig
held það sama gildi um þig
heldri konur hver á annarri níðast
Skothól gengið skal nú á
skelfilegt að segja frá
skömm að því hvað ég var latur síðast 

Vil fá meiri, Suðureyri
hætt hefur nú anda, vindurinn hér á Súganda
sólin gyllir, Spillir spillir
Suðureyri, ég verð að 

koma mér á Sæluhelgina... 

Söngvarakeppni sigra vil
sénslaust er það hér um bil
sextánda sætið ég þigg með þökkum
Mansakeppnin magnast brátt
má ég ekki taka þátt
mér er sagt að hún sé ætluð krökkum

Mansavinir, og allir hinir
koma á Sæluna, og ég læt ganga dæluna
um Suðureyri, því ég heyri
að hér er stuðið, ég verð að 

koma mér á Sæluhelgina...


Kveðja

Róbert
[e-mail]
S: 8404022

Ævar Einars strax farinn á rauðmaga

Eins og sagt var frá hér á síðunni í gær þá slasaðist Ævar Einarsson á baki þegar hann fékk þakjárnplötu í sig sl laugardag er hann var að spjalla við strákana sem voru í þakviðgerðunum á Súgfirðingasetrinu. Ævar var bara ágætlega sprækur í dag og eftir kvöldmatinn var ákveðið að skella sér á rauðmagaveiðar inn í fjörð og draga sex net úr sjó og leggja þau aftur og að auki tvo önnur fyrir utan skerið. Ævar var skipstjóri í þessari ferð en hásetar voru Valur Valgeirs og Hafliði. Nokkur net voru dregin upp frá Kleifinni inn að Laugum. Besta netið þar gaf 17 rauðmaga.

Svo var haldið inn að Mýganda og dregið þar upp eitt net sem gaf um 7 rauðmaga. Heildarveiðin í þessi sex net voru 56 rauðmagar, fáeinar grásleppur og kolar. Veðrið var ágætt og selirnir spókuðu sig á steinum hér og þar við ströndina, hávelluhópar flugu um fjörðinn og svo tók að bregða birtu. Ferðin var skemmtileg og alltaf gaman að sigla um fjörðinn sinn með góðu fólki.

Ævar er sem sagt þokkalegur eins og hann segir. "Ég læt ekki eina þakplötu stoppa ferðina okkar fjölskyldunnar til Tælands, það er alveg á hreinu," sagði Ævar og glotti út í annað. Það er greinilegt á kallinum að hann er brattur þrátt fyrir að hann sé marinn og sár á vinstri síðu og undir herðablaðinu. Ævar minnti á að val á sæluhelgarlaginu fari fram í Félagsheimili Súgfirðinga á morgun, þriðjudaginn 5. maí kl 18.00 og hvetur sem flesta að mæta og hlusta á lögin og kjósa.

Sem sagt, allir að mæta í FSÚ á morgun

Héru myndir úr rauðmagaferðinni með Ævari & co í dag:
http://sudureyri.blog.is/album/raudmagaveidi_i_sugandafirdi_/

Kv

Róbert

Rúm 100 kg á bala hjá línubátunum

Lítið fiskirí hefur verið hjá línubátum sem gera út frá Suðureyri síðast liðnar vikur en talið er að loðnu sé að finna víða á miðunum og að fiskurinn sé í góðu æti. En eitthvað er þó að aflast því í dag komu rúm 27 tonn á fimm línubáta sem skiptist eftirfarandi á milli báta: Bára 2.640 kg, Gestur 3.209 kg, Hrefna 3.769 kg, Kristján 3.547 kg og Lukka 1.254. Berti G var ekki skráður á vigtarblaðið en hann var svo sannarlega á sjó í dag og líklegt er að Berti G hafi aflað um eða yfir þrjú tonnin. Aflinn í dag var blandaður af þorski, steinbít, ýsu, hlýra og kola.

Á sunnudaginn fóru þrír bátar á sjó og þá var Berti G með 2.478 kg, Gestur 4.847 kg og Hrefna 3.075 kg. Helst eru bátarnir að sækja 20-30 mílur hér út en framundan er ekki góð spá fyrir smábátana. Búið er að lagfæra gamla löndunarkranann á höfninni og geta nú verið þrír kranar í gangi þegar margir bátar vilja landa á sama tíma.

Hér eru nokkrar myndir frá löndun nokkurra línubáta í dag og fleiri myndir eru í myndaalbúminu.

Kveðja

Róbert 

Veiddu 70 kg stórlúðu

Þeir Steindór Ingi Kjellberg og Tony á Kristjáni ÍS settu í 70 kg stórlúðu á línu fyrir stuttu um það bil 30 mílur út af Súgandafirði og var talsverður slagur að ná lúðunni inn fyrir. Lúðan var síðan send á fiskmarkað og seld. Stórlúður færa sig óðum á landgrunninn á þessum árstíma og seinni part maí geta menn búist við að setja í vænar lúður skammt frá landi og oft mjög grunnt. Talið er að stórlúður sæki mikið í rauðmaga á grunnslóðinni og jafnvel staðsetji sig undir fuglabjörgum þar sem þær borða svartfuglsegg sem falla úr bjarginu niður á sjávarbotninn.

Von er á fyrstu Þjóðverjunum til Suðureyrar og Flateyrar n.k. miðvikudag en sjóstangaveiðivertíðin hefst á þessum stöðum um miðjan maímánuð. Það verður forvitnilegt að fylgjast með hvort stórlúðum verður landað með vorinu en allir þýskir sjóstangaveiðimenn lifa í voninni um að setja í þá stóru. Ekki má gleyma fjölda heimamanna sem hafa brennandi áhuga á slíkri veiði og aldrei að vita nema nokkrir áhugasamir leggi haukalóð hér fyrir utan þegar líður á mánuðinn.

Kveðja

Róbert 

Sumarhátíð Súgfirðingafélagsins 26-28 júní

Helgina 26-28 Júní ætlar Súgfirðingafélagið í Reykjavík að efna til sumarhátíðar í Miðdal, á lóð prentara og bókagerðarmanna, ca. 5 mínútna keyrsla frá Laugarvatni.  Inná svæðið og tjaldstæði í 2 nætur fyrir fjölskylduna kostar alls 2000 kr.“   Dagskráin verður óhefðbundin eins og í fyrra.  Meðal þess sem er í boði eru ýmsir leikir fyrir alla fjölskylduna, svo sem pokahlaup, plankahlaup, boðhlaup, reyptog, eggjahlaup og margt fleira á meðan veður leyfir.  18 holu golfvöllur er á staðnum, leiktæki fyrir börnin og stutt í sund á Laugarvatni. Allir þeir sem taka þátt í hinum ýmsu leikjum fá verðlaunapening. Salernis og sturtuaðstaða er á svæðinu.

Furðufatakeppni.  
Efnt verður til furðufatakeppni sem kemur til með að standa alla helgina, allt kemur til greina svo endilega opnið fataskápana og tínið til gömlu fötin sem þið eruð hætt að nota. Með von um jákvæð viðbrögð og við sjáum sem flesta helgina 26-28 júní.   

Súgfirðingafélagið í Reykjavík.

Myndina tók Róbert Schmidt af Kolbrúnu Elmu Schmidt, frænku sinni og börnum sínum, þeim Arnóri Schmidt og Berglindi Melax á Sæluhelginni á Suðureyri 2008.

 

Þakplata slasaði mann við Súgfirðingasetrið í dag

Það lá við stórslysi um miðjan dag við Súgfirðingasetrið þegar mikil vindhviða feykti stórri þakplötu af þakinu en á henni voru tveir menn og voru að fara að negla hana niður þegar hviðan kom. Þeir köstuðust af plötunni og mátti þakka að þeir fóru ekki niður af húsinu en fallið er rúmir 10 metrar. Ævar Einarsson var að spjalla við Sigurþór, Atla og Bjarka í garðinum þegar þetta gerðist og kom þakplatan á ógnarhraða niður af þakinu og stefndi beint á strákana. Sem betur fer náðu allir að kasta sér undan plötunni en Ævar var óheppinn og fékk hana í bakið og kastaðist af hjólinu sem hann var á. Lögregla og sjúkrabíll mættu á staðinn og var Ævar fluttur á Fjórðungssjúkrahúsið á Ísafirði til aðhlynningar.

Í samtali við Ævar rétt í þessu, bar hann fyrir góða kveðju til strákana í Súgfirðingasetrinu en hann er illa marinn á baki og hruflaður. "Það má segja að úlpan sem ég var í hafi bjargað mér algerlega. Annars hefði platan stungist í gegn. Strákarnir voru allir heppnir því platan hefði getað tekið höfuðið af þeim öllum," sagði Ævar en hann ætlaði einmitt að heilsa uppá strákana til að bjóða þeim í félagsheimilið um kvöldið til að spila fyrir þá músík og syngja, svona rétt til að skemmta þeim örlítið eftir alla þessa miklu vinnu s.l. daga við Súgfirðingasetrið, þegar óhappið gerðist.

 Að sögn Sigurþórs Ómarssonar sem er einn af vinnumönnum við þakið á Súgfirðingasetrinu eru þeir allir í hálfgerðu sjokki eftir þetta en ef þeir hefðu ekki náð að kasta sér frá þakplötunni, þá hefðu þeir stórslasast á höfði. "Það var bara kraftaverk að þakplatan náði ekki í andlitin á okkur en við náðum allir að snúa okkur undan á sekúndubroti," sagði Sigurþór. 

Vinnan við að koma þakjárninu á hefur gengið vonum framar en aðeins er eftir smá hluti af þakinu sem verður klárað á morgun. Neðri myndin var tekin í gærmorgun þegar þeir náðu að taka allt gamla járnið af.

Við sendum Ævari bestu kveðjur um góðan bata

Kveðja

Róbert

 

Harmonikkuspil og hnallþórur

Það var glatt á hjalla á Suðureyri í dag, 1.maí og hátíðarhöld fjölmenn í tilefni dagsins. Að venju var farið í kröfugöngu frá Brekkukoti og að sögn Ævars Einars, þá var kröfugangan vel sótt að þessu sinni. Boðsund var í Sundlaug Suðureyrar og síðan var boðið uppá kaffihlaðborð í verkalýðshúsinu Bjarnarborg um miðjan dag. Báðar hæðirnar voru þétt setnar og veisluborðið svignaði undan kökum og kræsingum. Jóna Margrét Valgeirsdóttir fékk leikskólabörn til að syngja nokkur lög og einnig léku ýmis börn á hljóðfæri við góðar undirtektir gesta.

Árni frá Vöðlum í Önundarfirði mætti með harmonikkuna og spilaði helling af skemmtilegum og hressandi lögum og var mikil stemning í risinu þennan dag. Ævar Einars var sjálfskipaður söngstjóri og náði hann öllum með í fjöldasöng og fór létt með. Síðan mættu strákarnir sem eru að vinna við endurbætur á Súgfirðingasetrinu í kaffi og hvíldu hamra og sleggjur um stund og tóku þátt í hátíðarhöldum bæjarbúa með glöðu geði. Veður var frábært í dag, sólarglenna af og til og hægur vindur. Virkilega skemmtilegur dagur að baki.

Fleiri myndir frá deginum eru að finna í myndaalbúminu á forsíðunni.

Til hamingju með daginn verkafólk.

Kveðja

Róbert

Gamla þakjárnið komið af Súgfirðingasetrinu

Mikið líf er nú í og á Súgfirðingasetrinu þessa dagana en vinnuhópur úr Reykjavík vinnur hörðum höndum við endurbætur á þaki hússins og miðar verkinu vel. Strákarnir byrjuðu í gær að rífa þakjárnið af og kláruðu það fyrir hádegi í dag. Stefna þeir á að setja nýjan þakpappa á og nýtt járn í dag og á morgun. Veður var skaplegt í dag og um tíma skein sólin á þessa harðduglegu kappa sem leggja mikið á sig í sjálfboðavinnu fyrir Súgfirðingafélagið í Reykjavík. Í hópnum eru þeir bræður Sigurþór og Atli Ómarssynir, Bjarki Þór Bjarnason og tveir til viðbótar sem ég hef ekki fengið nöfn á ennþá.

Íslandssaga útvegaði strákunum fisk í matinn í gærkveldi og í kvöld mun undirritaður elda nýskotinn svartfugl fyrir þá enda verða þeir líklega svangir og þreyttir eftir þessa erfiðu vinnu. Hér á Suðureyri fá þeir ágæta aðstoð frá heimamönnum og fyrirtækjum sem er þakkarvert í alla staði. Ég segi betur frá hvernig verkinu miðar um helgina. Fleiri myndir eru í merktu myndaalbúmi á forsíðunni.

Kveðja

Róbert

Steinn féll á veginn við Kleif

Allstór steinn féll úr hlíðinni við Kleif í Súgandafirði í nótt eða morgun. Eins og sjá má á meðfylgjandi ljósmyndum sem undirritaður tók kl 08.30 í morgun (1.maí) er steinninn mjög stór og vegur líklega vel á annað tonn. Mikill mildi var að steinninn fór ekki lengra út á veginn en ef umferð hefði verið á þeim tíma þyrfti varla að spyrja að leikslokum. Steinninn verður væntanlega fjarlægður fljótlega.


Kveðja

Róbert